اهمية الرياضة

لو حاولت تعمل دايت قبل كده من غير رياضة و كنت مستني نتيجة مذهلة يبقي اكيد بتهزر, الرياضة ليها فوايد كتيرة جداً.. هنا احنا هنتكلم عن اهمية التمارين والرياضة لجسمك وازاي هي ممكن تكون سبب انك تكمل دايت..

نقدر نقول ان اهمية الرياضة:

1- الرياضة بتقدر تخليك مبسوط و بتقلل من طاقة الاكتئاب والقلق وده لانه بيتم افراز هرمون الاندروفين واللي بيزود المشاعر الايجابية وبيقلل الاحساس بالالم .

2- اكيد بتساعدك في انك تخس, لما بتعمل دايت او نظام غذائي مناسب ليك وبتكون السعرات الحرارية منخفضة عن الطبيعي بتاعك فده بيقلل من سعراتك ولكن مش بيسرع الحرق على عكس لعبك للرياضة, لانك لما بتعلب رياضة ده بيزود من حرق السعرات الحرارية وبيسهل فقدان الوزن.

3- الرياضة بتقوي العضلات والعظام بشكل عام.

طيب العضلات عشان لعب الرياضه بيزود من قدرة العضلات في امتصاص الاحماض الامينة , طب بالنسبة للعظام ازاي؟!!

التمارين بشكل عام بتساعد علي بناء كثافة للعظام ويستحسن لو بدأت الرياضة من سن صغير كمان بيظهر التأثير الايجابي علي العظام في الالعاب الرياضية الفردية اكتر من الالعاب الجماعية ( الجمباز , الجري , السباحة)

4- هتزود طاقة جسمك بشكل عام وهتحس بعد التمرين بطاقة كبيرة جواك خصوصاً لو كلت (سبانخ , فجل ,خس, شوفان ,البيض,الزبادي, التونه) لان دي اهم الاكلات اللي بتمد الجسم بالطاقة بعد التمرين وبتمنع من ضعف وضمور العضلات .

5- الرياضة بتساعدك علي مواجهة الشيخوخة و بتزيد من انتاج الاجسام المضادة للاكسدة واللي بتساعد علي حماية خلايا البشرة.

6- المشكلة اللي كلنا بنعاني منها الرياضة بتحلها ….. بتساعدك تقوي الذاكرة وده لانها بتزود من معدلات ضربات القلب واللي بتساعد في تدفق الدم والاكسجين للعقل وبتحفز افراز الهرومانات المساعدة لنمو خلايا الدماغ ….

الرياضة المنتظمة مهما كان نوع الرياضة هي مهمه جداً ومينفعش تعمل دايت من غير رياضة لان لو عاوز تخس او لو عاوز تحافظ علي صحة جسمك وقوته يبقي انت لازم تمارس رياضة بجانب دايت متناسق فيه كل العناصر الغذائية